ପରିସମାପ୍ତିର ପୂର୍ବରୁ

ପରିସମାପ୍ତିର ଠିକ ପୂର୍ବରୁ

ସବୁକିଛି ପୁଣି କାହିଁକି

ଜୀବନ୍ତ ହୋଇଉଠେ!

ସ୍ମୃତିର ବକ୍ଷ ଚିରି

ଅତୀତ ଆଜି ଭାସି ଉଠେ

ଜଳଜଳ କରି ଆଖି ଆଗରେ ।

 

ଇତିର ଅୟମାରମ୍ଭ ଆଗରୁ

ଆରମ୍ଭ କାହିଁକି ଆଜି

ପୁନଶ୍ଚ ସ୍ଵପ୍ନ ଦେଖାଏ

ଆଉ ଏକ ନୂଆ ଆରମ୍ଭର!

ଭିନ୍ନ ମୋଡ ନେବାକୁ ଚାହେଁ

ଗତିପଥ ଜୀବନର,

ବଦଳାଇଦେବାକୁ ଚାହେଁ

ରୂପ ଇତିର।

 

ନାଟକରେ ଯବନୀକା ପଡିବା ଆଗରୁ

ଶେଷ ଦୃଶ୍ୟର ଠିକ ଆଗରୁ

ଭାସିଉଠନ୍ତି ମାନସପଟରେ

କାହାଣୀର ଚରିତ୍ର ସବୁ !

ଇଚ୍ଛା ହୁଏ ଭିନ୍ନ ରୂପ ଦେବାକୁ

କିଛି ଚରିତ୍ରକୁ ଲେଖିଦେବାକୁ

ଆଉ ଏକ ନୂଆ ରୂପରେ।

 

ସମୟ ସରିଆସୁଥିବା ବେଳେ

 ଅତୀତ କାହିଁକି ଜାବୁଡି ଧରେ

ଜୋରରେ, ଆହୁରି ଜୋରରେ!

 ନିଃଶ୍ଵାସ ଛାଡିଯାଉଥିବା ବେଳେ

ବିଶ୍ଵାସ କାହିଁକି ହୋଇଉଠେ

ଆହୁରି ଦୃଢରୁ ଦୃଢତର!

ଜୀବନର ଆସକ୍ତି ବାନ୍ଧି ବସେ,

ଆଉ କିଛି ସମୟ ବଞ୍ଚିଯିବାର ଆଶା।

ଧରି ରଖିବାକୁ ଚାହେଁ ସମୟର ଡୋରି

ଚିରକାଳ ଲାଗି ନିଜ ହାତମୁଠାରେ।

 

ସବୁ ଶେଷର ଆରମ୍ଭ ଆଗରୁ

ହଠାତ ସବୁକିଛି ନୂଆ ରୂପରେ

ପରିକଳ୍ପନାର ଆରମ୍ଭ ହୁଏ

ହୃଦୟ କାହିଁକି ଉଦ୍‌ବେଳିତ ହୁଏ

ସବୁ ପରିସମାପ୍ତିର ଠିକ ଆଗରୁ!